ماسك التلبينة لتجديد البشرة من خبيرة التجميل رانيا
والنهارده هنتكلّم عن حاجة يمكن مش بنستخدمها كتير في حياتنا اليومية، لكن لها فوائد كتيرة جدا للبشرة والشعر والجسم بشكل عام؛ سواء هنستخدمها كمشروب أو ماسك وهي التلبينة.
وكمان هنعرف إيه المشروبات اللي ممكن نتناولها علشان تحسّن حالتنا المزاجية؛ خصوصا للناس اللي بتعاني من اكتئاب في فصل الشتاء.
أكلات ومشروبات لمزاج أفضل في الشتاء
النهارده هنقول على بعض الأكلات والمشروبات اللي ممكن تساعدنا إننا نبقى في مود وحالة مزاجية أفضل.
ومن أهم الأكلات اللي معروفة عند ناس كتير وبتضبط الحالة النفسية وتخلّيها مرتفعة هي الشيكولاتة، بس طبعا ماناخدش منها كميات كبيرة خصوصا لو بنعمل ريجيم.
كمان عصير الموز باللبن بيعتبر من المشروبات اللي بتعمل على تحسين الحالة المزاجية بشكل كبير، وممكن نضيف عليه ملعقة كبيرة حبة البركة مطحونة، ومش بس مفيد كمشروب ده إحنا ممكن نستخدم الخليط ده ونعمل به ماسك لبشرة الوش.
ومشروب حبة البركة لوحده مفيد جدا، وممكن نعمل به سنفرة لبشرة الوش، وده بيكون مناسب جدا للبشرة الجافة وشديدة الجفاف.
مشروبات وماسكات بالتلبينة لنعومة البشرة
التلبينة بتعتبر من الحاجات المفيدة جدا اللي ممكن تُستخدم كمشروب مغذي للكبار والأطفال، وممكن نضيف معاها زنجبيل مطحون أو قرفة أو قرنفل أو قهوة أو نسكافيه.
مش بس كده ده إحنا نقدر نعمل بها ماسكات كتيرة لسنفرة وتفتيح وتغذية ونعومة البشرة، وهي موجودة ومتوفّرة في السوق وسعرها مش بيزيد على 10 جنيه.
ماسك التلبينة لسنفرة وترطيب البشرة
المقادير:
ملعقة كبيرة تلبينة
½ ملعقة عسل نحل
ميه سخنة
الطريقة:
هنخلط المقادير كلها مع بعض لحد ما نحصل على عجينة لينة، وبعد كده بنفردها على الوش والجسم، وممكن نحطّها فوق وتحت العين ونسيبها من 30 : 45 دقيقة على البشرة، والماسك ده ممكن نعمله مرة واحدة أسبوعيا، ومع المواظبة هنحصل على بشرة ناعمة ونضرة.
